ရွှေဘိုမြို့တွင် ကလေးစာပေပွဲတော်၊ ကလေးစာပေပြပွဲနှင့် စာအုပ်ဈေးရောင်းပွဲတော်

ရွှေဘိုမြို့တွင် ကလေးစာပေပွဲတော်၊ ကလေးစာပေပြပွဲနှင့် စာအုပ်ဈေးရောင်းပွဲတော် ကျင်းပမည်

မတ်၊ ၁၅ ရက်

စစ်ကိုင်းတိုင်းဒေသကြီး၊ရွှေဘိုခရိုင်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနက ကျင်းပပြုလုပ်မည့် ကလေးစာပေပွဲတော်၊ ကလေးစာပေပြပွဲနှင့် စာအုပ်ဈေးရောင်းပွဲတော်ကို ကလေးများ၏ ဉာဏ်ရည်ဉာဏ်သွေး နှင့် အယူအဆများ ထက်မြက်လာစေရန်၊ ကလေးများ၏ တီထွင်ဖန်တီးလိုစိတ်များ ရင့်သန်လာစေရန်နှင့် ကလေးများ၏ အပြောအဆိုနှင့် နှုတ်မှုရေးရာ စွမ်းရည်များ မြင့်မာစေရန်၊ ကလေးများစာပေနှင့် ရင်းနှီးပြီး ကလေးများ၏ ပျော်ရွှင်မှုကို စာဖတ်ခြင်းဖြင့် ဖန်တီးပေးရန်ဟူသော ရည်ရွယ်ချက်ဖြင့် မတ်လ ၂၉ ရက် နံနက် ၈ နာရီမှ ညနေ ၅ နာရီထိ ရွှေဘိုမြို့၊ TWS ကိုယ်ပိုင်အထက်တန်းကျောင်း၌ ကျင်းပပြုလုပ်သွားမည် ဖြစ်ကြောင်း သိရသည်။

ကလေးစာပေပွဲတော် ကျင်းပနိုင်ရေးနှင့်ပတ်သက်၍ "ကျွန်တော်တို့အနေနဲ့ မတ်လ ၂၉ ရက်မှာ TWS ကိုယ်ပိုင်းအထက်တန်းကျောင်းမှာ ဌာနဆိုင်ရာများနဲ့ ပူးပေါင်းကျင်းပသွားမှာပါ။ ကလေးများအနေနဲ့ စာအုပ်စာပေနဲ့ ရင်းနှီးစေဖို့၊ တီထွင်ကြံဆတက်စေဖို့နဲ့ အသင်းအဖွဲ့စိတ်ဓာတ်နဲ့ စုပေါင်းဆောင်ရွက်တက်စေဖို့ပါ။ နောက်ပြီး အနာဂတ်အတွက် ကလေးများက အဓိကကျပါတယ်။ ဒါကြောင့် သူတို့လေးတွေ့ အသိပညာဗဟုသုတ ပြည့်စုံဖို့ အလွန်အရေးကြီးပါတယ်" ဟု ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ရွှေဘိုခရိုင်ဦးစီးအရာရှိမှ ပြောကြား သည်။

ကလေးစာပေပွဲတော်အတွက်ပြင်ဆင်ထားမှုနှင့် ပတ်သက်၍ "အခုကလေးစာပေပွဲတော်အတွက် ဌာန ဆိုင်ရာတွေအားလုံး ပူးပေါင်းပါဝင်ကြပါတယ်။ ပွဲတော်မတိုင်မီမှာ စည်းရုံးလှုံဆော်ရေးအနေနဲ့ ကျွန်တော်တို့ ပြန်/ဆက်ဦးစီးဌာနနဲ့ ပညာရေးဌာနတို့ ပူးပေါင်းပြီး ကားနဲ့ မြို့ထဲမှာ လှည့်လှယ်တယ်။ ပြီးတော့ လက်ကမ်းများ ဝေငှဆောင်ရွက်နေပါတယ်။ ပွဲတော်လာကြမယ့် ကလေးများအတွက် ကလေးကဗျာများ၊ ကလေးများ ကြိုက်နှစ်သက်ကြတဲ့ ကာတွန်းဇာတ်ကောင်များနဲ့ ဓာတ်ပုံတွဲရိုက်လို့ရအောင် စတစ်ကာပုံတွေနဲ့ စီစဉ်ထားတယ်၊ နောက်ပြီး 3D ကာတွန်းပုံတွေ၊ အရုပ်ပုံတွေလည်း စီစဉ်ထားတယ်၊ ပျော်စရာ ဂိမ်းတွေလည်း စီစဉ်ထားတယ်။ ဒါကြောင့် ပွဲတော်လာရောက်ကြတဲ့ ကလေးတိုင်း အသိပညာ ဗဟုသုတရရှိပြီး ပျော်ရွှင်ကြရမှာပါ" ဟု ၎င်းကဆက်လက် ပြောကြားသည်။

"ကျွန်တော်တို့ ပညာရေးဌာနအနေနဲ့လည်း ဖျော်ဖြေရေးအစီအစဉ်များကို ထည့်သွင်းထားပါတယ်။ ကလေးစာပေပွဲတော်သီချင်း၊ တိုင်းရင်းသားအကများ၊ တေးသရုပ်ဖော်အကများနဲ့ ဖျော်ဖြေတင်ဆက်သွားမှာပါ။ နောက်ပြီး ပွဲတော်မှာ စကားပုံဆက်ပြိုင်ပွဲ၊ အရုပ်ဆက်ပြိုင်ပွဲ၊ ခွက်နင်လမ်းလျှောက်ပြိုင်ပွဲ၊ ဘောလုံးလိမ့် ကစားပြိုင်ပွဲ၊ ဖိနပ်စီးလမ်းလျှောက်ပြိုင်ပွဲ၊ ပူစီပေါင်းညှပ်ပြိုင်ပွဲများ ပါဝင်မှာ ဖြစ်တဲ့အတွက် အသင်းအဖွဲ့စိတ်နဲ့ စုပေါင်းဆောင်ရွက်တတ်မှာဖြစ်မှာဖြစ်ပါတယ်" ဟု ကျောင်းအုပ်ဆရာကြီး တစ်ဦးမှ ပြောကြားသည်။ 

အဆိုပါ ကလေးစာပေပွဲတော်တွင် ပုံပြောပြိုင်ပွဲများ၊ ဆေးရောင်စုံခြယ် ပြိုင်ပွဲများ၊ ဂိမ်းကစားပြိုင်ပွဲများ၊ စကားပုံဆက်ပြိုင်ပွဲများ၊ အရုပ်ဆက်ပြိုင်ပွဲများ၊ အရုပ်ဆက်အိမ်ဆောက်ကစားနည်းများ၊ ဖျော်ဖြေပွဲများ၊ ကာတွန်း ပြခန်းများ၊ 3D ကာတွန်းရုပ်များနှင့် ဆရာကြီးမင်းသုဝဏ်၏ ကလေးကဗျာပြခန်းများဖြင့် ပြသ ဆောင်ရွက် သွားမည် ဖြစ်ကြောင်း သိရပြီး ပွဲတော်လာရောက်ကြသူများအား အလှူရှင်များမှလှူဒါန်းသည့် ဗလာစာအုပ်များ လက်ဆောင် ပေးသွားမည့်အပြင်အချိုရည်နှင့်မုန့်များကျွေးမွေးသွားမည်ဖြစ်ကြောင်းသိရသည်။ 

ခရိုင်(ပြန်/ဆက်)

မူရင်း Ko Myo